हिन्दी, इंग्लिश और उर्दू में साहिबा के अर्थदेखिए

صاحبہ ’’بہارعجم‘‘ میں ’’صاحبہ‘‘ درج نہیں۔ ’’آنند راج‘‘ میں اس کے معنی لکھے ہیں، ’’وہ عورت جو کسی کی بیوی ہو‘‘۔ یعنی اردو میں جن معنی (بیوی)میں’’صاحب‘‘ ہے، فارسی میں’’صاحبہ‘‘ انھیں معنی میں ہے۔ اردو میں صاحبہ‘‘ کو ’’صاحب‘‘ کی تانیث قراردے کر عورتوں کے نام یا عہدے کے ساتھ ’’صاحبہ‘‘کا لاحقہ گذشتہ پچاس ساٹھ برس میں رواج پا گیا ہے۔ ورنہ شبلی نے اپنے مکتوبات میں زہرا فیضی کو ہمیشہ ’’زہرا صاحب‘‘ لکھا ہے۔ آج بھی’’بیگم صاحب‘‘ زیادہ رائج ہے، ’’بیگم صاحبہ‘‘ کہنا معیوب سمجھا جاتا ہے۔ لیکن ’’شہزادی، ملکہ‘‘ وغیرہ جیسے الفاظ اور رشتوں کے ساتھ اب ’’صاحبہ‘‘ کا چلن عام ہوگیا ہے۔ نامناسب: استانی صاحبہ، بی بی صاحبہ، بیگم صاحبہ، خاتون خانہ صاحبہ، وغیرہ۔ مناسب: استانی صاحب، بی بی صاحب، بیگم صاحب، پرنسپل صاحب، خاتون خانہ صاحب، ڈاکٹر صاحب، سکریٹری صاحب، لیڈی ڈاکٹر صاحب، وغیرہ۔ مناسب: بھابی صاحبہ، پیرانی صاحبہ، خالہ صاحبہ، دادی صاحبہ، رانی صاحبہ ۔[لیکن اگر اس جگہ کا بھی نام بتایا جائے جہاں کی رانی ہے، تو’’صاحب‘‘ لگانا بہتر ہے۔ مثلاً ’’رانی صاحب جے پور، رانی صاحب دربھنگہ‘‘ وغیرہ]، شہزادی صاحبہ، ملکہ صاحبہ وغیرہ۔ عبد الرشید کہتے ہیں کہ یہ لفظ ’’آصفیہ‘‘ میں بھی ہے۔ یہ درست ہے، لیکن وہاں جو معنی لکھے ہیں وہ بہت مشکوک ہیں (جنابہ، صاحب کی تانیث)۔ان سے کچھ ثابت نہیں ہوتا۔ جناب فیصل احمد بھٹکلی نے مجھے بتایا ہے کہ عربی میں’’صاحب‘‘ بمعنی’’شوہر‘‘ اور ’’صاحبہ‘‘ بمعنی ’’بیوی‘‘ عام ہیں۔

ماخذ: لغات روز مرہ    
مصنف: شمس الرحمن فاروقی