اردو، انگلش اور ہندی میں رو دینا کے معانیدیکھیے

رو دینا خواجہ عبد الرؤوف عشرت نے لکھا ہے کہ’’اس نے رو دیا‘‘ غلط ہے۔ انھوں نے داغ کا شعر نقل کیا ہے ؎ محبت نے کی جب مری دستگیری مقدر نے رو رو دیا ہاتھ مل کر اس پر خواجہ صاحب کا ارشاد ہے، ’’رو دینا فعل لازم ہے اور فعل لازم کے ساتھ ’نے‘ نہیں لاتے۔ ’مقدر نے رودیا‘ کتنا غیر فصیح ہے۔۔۔’مقدر رو دیا‘ کہنا چاہئے۔ یعنی’مقدر ہاتھ مل کر رو دیا‘ فصیح ہے‘‘۔ یہاں خواجہ صاحب نے خلط مبحث کردیا ہے۔ اگر’’رو دینا‘‘ کے ساتھ ’’نے‘‘ لانا غلط ہے تو پھر فصیح یا غیر فصیح کی بات نہیں رہ جاتی۔ اور اگر’’رودینا‘‘ کے ساتھ ’’نے‘‘ لانا غیر فصیح ہے، تو کوئی ضروری نہیں کہ وہ غلط بھی ہو۔ غیرفصیح لفظ کے لئے شرط نہیں ہے کہ وہ غلط بھی ہو۔ جہاں تک سوال’’میں نے رو دیا‘‘ وغیرہ کے صحیح و فصیح ہونے کا ہے تو داغ کی سند پر اسے صحیح و فصیح کہنے میں کوئی تکلف نہ ہونا چاہئے۔ دیکھئے، ’’ہنس دینا‘‘۔

ماخذ: لغات روز مرہ    
مصنف: شمس الرحمن فاروقی