हिन्दी, इंग्लिश और उर्दू में यौवन के अर्थदेखिए

یوون اول سوم مفتوح، بمعنی’’جوبن‘‘، ہندی میں ہے۔ اردو میں صرف ’’جوبن‘‘ ہے (اول سوم مفتوح)۔ لیکن بعض لوگ ’’خالص‘‘ زبان کے چکر میں، یا ہندی کے زیر اثر اردو میں بھی’’یوون‘‘ لکھنے لگے ہیں۔اردو میں ’’یوون‘‘ غلط ہے۔ لیکن یہ لفظ اس لئے دلچسپ ہے کہ اس میں اصل سنسکرت (تت سم) سے اردو (تدبھو) بنانے کے بارے میں دو اصولی باتیں معلوم ہوتی ہیں۔ ایک تو یہ کہ تت سم کی ’’یائے‘‘، تدبھو (یعنی اردو) میں جیم بن جاتی ہے۔ دوسرا اصول یہ ہے کہ تت سم کی واؤ، تدبھو ( یعنی اردو ) میں ب بن جاتی ہے۔ چنانچہ ’’یوون‘‘ تت سم ہے، اس کا تدبھو’’جوبن‘‘۔ ’’یمنا‘‘ تت سم ہے، اس کا تدبھو’’جمنا‘‘ ہے۔ ’’ونش‘‘ تت سم ہے، ’’بنس‘‘ تد بھو ہے۔ ’’ویش‘‘ تت سم ہے، ’’بھیس‘‘ تدبھو ہے۔’’ایودھیا‘‘ تت سم ہے، ’’اجودھیا‘‘ تد بھو ہے۔ ’’ورشا‘‘ اور’’ورش‘‘ تت سم ہیں، ’’برکھا‘‘ اور’’برس‘‘ تد بھو ہیں۔’’خالص پسند ‘‘ لوگ تت سم کے دلدادہ ہوتے ہیں۔ لیکن جو لوگ زبان کی حرکی حقیقت سے واقف ہوتے ہیں، ان کی نظر میں تد بھو ہی زندہ لفظ ٹھہرتا ہے۔ اردو نے سنسکرت تت سم لفظوں کو اکثر تد بھو بنا لیا ہے یا تت سم کی شکل اپنی آسانی کے موافق کرلی ہے، جیسے’’کشیترا‘‘ کی جگہ ’’کھیت‘‘، ’’برکش‘‘ کی جگہ ’’برکھ‘‘، ’’مترا‘‘ کی جگہ ’’میت‘‘، اور کبھی کبھی تدبھو کو بالکل ترک کردیا ہے، جیسے’’مرگ‘‘ کی جگہ ’’ہرن/آہو‘‘ قبول کیا، لیکن ’’ہرن کی کھال کی بنی ہوئی چٹائی کے لئے ’’مرگ چھالا‘‘ بنا کر رائج کرلیا۔ مجموعی طور پر دیکھیں تو سنسکرت سے اردو کا استفادہ انتہائی تخلیقی رہا ہے اور سنسکرت تدبھو الفاظ ہماری زبان کی بڑی شانوں میں سے ایک شان ہیں۔ دیکھئے، ’’تت سم‘‘۔

ماخذ: لغات روز مرہ    
مصنف: شمس الرحمن فاروقی