اردو، انگلش اور ہندی میں مُخَفَّفات کے معانیدیکھیے

مخففات بہت سی مغربی زبانوں میں لفظ کی جگہ اس کے مخفف کے طور پر اس کا پہلا حرف رکھ دیتے ہیں۔ یہ صورت ناموں کے لئے اکثر دکھائی دیتی ہے۔ چنانچہ: G.B.Shaw بجائے George Bernard Shaw W.B.Yeats بجائے William Butler Yeats مستعمل ہیں۔ یا پھر:U.N.O.بجائےUnited Nations Organization وغیرہ۔ ہماری زبانوں میں یہ رسم نہیں ہے۔ ہندی والوں نے اخبار میں اسے رائج کرنے کی کوشش کی ہے۔ لیکن ہندی میں حرف کا تصور اس پر حرکت کے بغیر نہیں، لہٰذا وہ لوگ جب مخفف بناتے ہیں تو حرف کے ساتھ اس کی حرکت بھی لکھتے ہیں۔ اس طرح بعض مضحک صورت حالات پیدا ہوتی ہیں، اور ہندی والے بھی وہاں مخفف بناتے ڈرتے ہیں۔ مثلاً ’’مدھیہ ریلوے‘‘ کا ہندی مخفف ہو گا: ’’مَرے‘‘۔ اس سے بھاگ کر وہ لوگ ’’مَدھیہ‘‘ لکھ کر کام چلاتے ہیں۔ سیاسی جماعتوں کے ناموں کے ساتھ اور بھی بھونڈی شکلیں ہندی میں بنائی جاتی ہیں: بھارتیہ جنتا پارٹی=بھاجپا، سماج وادی پارٹی=سپا، مارکس وادی کمیونسٹ پارٹی=ماکپا، بہوجن سماج پارٹی=بسپا، وہپ=وشو ہندو پریشد یہ شکلیں کتنی بھونڈی اور زبان کے مزاج سے کس قدر متغائر ہیں، یہ کہنے کی ضرورت شاید نہیں۔ لیکن افسوس کہ بعض اردو اخباروں میں بھی یہ مخففات دھڑلے سے برتے جارہے ہیں۔ ان کو ترک کرنا چاہئے۔ ہمارے بعض جدید شعرا نے انگریزی کے تتبع میں اپنا نام مخففات کے ساتھ لکھنا شروع کیا تھا، مثلاً نذر محمد راشد کی جگہ ن م راشد۔ لیکن راشد صاحب کے سوا کسی کا نام مقبول نہ ہوا۔ اور اب یہ رسم کم و بیش ترک ہے۔ ناموں کی حد تک تو شاید کچھ جواز بھی ہو، لیکن سیاسی پارٹیوں، ریلوں، دفتروں، وغیرہ کے نام کو مخفف استعمال کرنا ہندی کی بھونڈی نقل، اردو کے مزاج کے خلاف، اور ہر طرح واجب الترک ہے۔ جاننا چاہئے کہ ہر زبان کے مزاج میں ایک بات یہ بھی ہوتی ہے کہ اسے تیز بولا جائے گا یا آہستہ آہستہ ادا کیا جائے گا۔ مثلاً فرانسیسی بہت تیز بولی جاتی ہے۔ اردو آہستہ آہستہ بولی جاتی ہے۔ انگریزی کی رفتار ادائیگی فرانسیسی سے کم لیکن اردو سے زیادہ ہے۔ ملیالم اور تمل فرانسیسی سے بھی زیادہ تیزی سے ادا کی جاتی ہیں۔ تو جو زبان کہ تیزی سے ادا نہ ہوتی ہو، و ہ پورے لفظ لکھنے یا بولنے کے بجائے ماکپا، بھاجپا، بسپا جیسے اینڈے بینڈے مخففات کیوں کر پسند کرے گی؟

ماخذ: لغات روز مرہ    
مصنف: شمس الرحمن فاروقی