हिन्दी, इंग्लिश और उर्दू में दिखना के अर्थदेखिए

دکھنا ’’دکھائی دینا‘‘ کے معنی میں’’دسنا‘‘ پرانی اردو میں موجود تھا، شاہ مبارک آبرو ؎ گردش انکھیاں میں وہ برچھی نگہ قاتل مجھے یوں دسے تروار کوئی جیسے دھری ہو سان کی دستی ہے نجوموں کی سفیدی میں سیاہی جاتے ہی مکاں لیوے گا یہ شیر الٰہی (نظیر اکبر آبادی، نظم ’’خیبر کی لڑائی‘‘) افسوس کہ ’’دسنا‘‘ ترک ہو گیا، لیکن اب اس کی جگہ ’’دکھنا‘‘ کو فروغ دینا عقل مندی نہیں، کہ یہ لفظ بھونڈاہے۔ علاوہ بریں اسے ہندوستانی عیسائیوں (یاBrown Sahibs) نے رائج کیا تھا۔ اردومیں اس کا کوئی مقام نہیں۔ شیکسپیئر، ’’آصفیہ‘‘ اور’’نوراللغات‘‘ میں یہ لفظ درج نہیں ہے۔ پلیٹس نے’’دکھنا‘‘ لکھا ہے، لیکن اسے’’مقامی بولی‘‘ (Dialect) بتایا ہے، کس جگہ کی مقامی بولی، یہ صراحت نہیں۔ فیلن (Fallon) نے بھی’’دکھنا‘‘ درج کیا ہے لیکن اسے’’مخصوص بہ مسلماناں‘‘ لکھا ہے، جو حیرت انگیز نہیں تودلچسپ ضرور ہے، کہ میں نے کسی مسلمان کو’’دکھنا/دکھانا‘‘ یا ان کی تصریفی شکلیں بولتے نہیں سنا۔ ممکن ہے بعض علاقوں میں یہ لفظ وسط انیسویں صدی کے بعد رائج ہوا ہو، لیکن صاحبان ’’آصفیہ‘‘ و ’’نور‘‘ اسے جدید اردو نہیں مانتے، اور نہ ہی میں مانتا ہوں۔ پروفیسر گیان چند کا خیال تھا کہ ’’دسنا‘‘ شمالی ہند کی اردو میں نہیں تھا۔ لیکن مندرجہ بالا مثالیں اس کا وجود شمالی ہندمیں ثابت کرتی ہیں۔ جناب عبد الرشید نے مثالوں سے ثابت کیا ہے کہ شمالی ہند کی پرانی اردو میں ’’دکھنا‘‘ بھی تھا۔ وہ کہتے ہیں، ’’ممکن ہے پرانے ادب میں یہ فعل رائج رہا ہو اور بعد میں اس کا استعمال کم ہوتا چلاگیا‘‘۔

ماخذ: لغات روز مرہ    
مصنف: شمس الرحمن فاروقی