Meaning ofSee meaning ha.ns denaa in English, Hindi & Urdu

ہنس دینا عام خیال ہے کہ’’ہنس دینا‘‘ کے ساتھ ’’نے‘‘ نہیں لگتا۔ خواجہ عبد الرؤوف عشرت نے لکھا ہے کہ ’’میں نے ہنس دیا‘‘ ناجائز ہے۔ یہ بات صحیح ہے کہ اگر ’’ہنس دینا‘‘ کے ساتھ ’’نے‘‘ لگانے کا محل ہو تو آج کل عبارت ایسی بناتے ہیں کہ ’’نے‘‘ کے بغیر کام چل جائے۔ لیکن ’’میں نے ہنس دیا‘‘ کو غلط کہنا مشکل ہے۔ محمد حسین آزاد نے’’آب حیات‘‘ میں (دربیان غالب، حالات قیام کلکتہ) لکھا ہے: دوسرے نے ’’گلستاں‘‘ کا فقرہ پڑھا، ’یکے از صلحا را باد مخالف درشکم پیچید‘ اورسب نے ہنس دیا۔ آج کل ’’سب ہنس پڑے/سب ہنس دئے‘‘ لکھنا بہتر ہوگا، لیکن محمد حسین آزاد کی سند کے بعد اسےغلط نہیں کہہ سکتے۔ حسرت موہانی نے بھی اسی طرح کا فقرہ ’’نوادرسخن‘‘ میں نقل کیا ہے اور اسے شاذ استعمال شمارکیا ہے، لیکن اسے غلط نہیں کہا۔ دیکھئے، ’’رو دینا‘‘۔

ماخذ: لغات روز مرہ    
مصنف: شمس الرحمن فاروقی