Meaning ofSee meaning bavaal in English, Hindi & Urdu

بوال میں نے یہ لفظ سب سے پہلی بار۵۴۹۱/۶۴۹۱ میں اعظم گڈھ میں اپنے ایک اسکولی ساتھی کی زبان سے سنا تھا، بمعنی’’پریشانی، جھنجھٹ‘‘، بلکہ اس نے’’بوال کٹنا‘‘ بمعنی’’پریشانی کم ہونا، جھنجھٹ دور ہونا‘‘ کے معنی میں بولا تھا۔ میں دیرتک محو حیرت رہا تھا کہ یہ عجب لفظ ہے، ممکن ہے ’’وبال‘‘ کا گنوارو تلفظ ہو، اگرچہ معنی کچھ بدلے ہوئے ہیں۔ اب کوئی ساٹھ برس بعد یہی لفظ ہندی میں تقریباً انھیں معنی میں رائج دیکھتا ہوں، یعنی ’’ جھنجھٹ، جھگڑا، تنازعہ، بحث مباحثہ‘‘۔ مجھے کیا معلوم تھا کہ مجھے وہ دن بھی دیکھنا پڑے گا جب اردو کا ایک ادبی رسالہ اس قسم کا جملہ بے تکلف چھاپے گا: [فلاں معاملے ] پرمچے بوال کے تناظر میں کافی کار آمد اور پرمغز مضمون ہے۔ ڈنکن فوربس نے اپنے لغت میں دیہاتی اور بازارو الفاظ کو درج کرنے کا اہتمام کیا ہے لیکن اس کا لغت بھی’’بوال‘‘ سے خالی ہے۔ یہ لفظ اردو ہے ہی نہیں، پھر اسے کوئی کیوں لکھے اور کوئی مدیر اسے اپنے صفحے پر کیوں جگہ دے؟

ماخذ: لغات روز مرہ    
مصنف: شمس الرحمن فاروقی