हिन्दी, इंग्लिश और उर्दू में सतहा के अर्थदेखिए

سطحہ اس لفظ میں بھی ہائے ہوز زائدہ ہے۔ ’’سطح‘‘ کے معنی میں یہ لفظ عربی فارسی میں نہیں ہے، اردو والوں نے ’’موج/موجہ‘‘ وغیرہ کے طرز پربنا لیا ہے۔ ’’اردو لغت، تاریخی اصول پر‘‘ یہ شعر بطور سند ملتا ہے ؎ سطحہ جو نور شہ سے ہے انور زمین کا ہے مجرئی دماغ بھی عرش پر زمین کا ملحوظ رہے کہ ’’سطحہ‘‘ یہاں مذکر استعمال ہوا ہے۔ پرانے زمانے میں’’سطح‘‘ کو بھی مذکر باندھ لیتے تھے۔ میر ؎ سب سطح ہے پا نی کا آئینے کا سا تختہ دریا میں کہیں شاید عکس اس کے بدن کا تھا زمانۂ حال میں لفظ ’’ سطحہ‘‘ دیکھنے میں نہیں آیا۔ لیکن اگر برتا جائے تو کچھ حرج نہیں۔ ’’آوازہ‘‘ اور ’’موجہ‘‘ کے قیاس پر اسے بھی مذکر قرار دے سکتے ہیں۔ بعض لوگوں کا خیال ہے کہ ’’سطحہ‘‘ غلط املا ہے’’سطح‘‘ کا۔ یہ بات درست نہیں معلوم ہوتی، کیوں کہ عربی میں’’سطحہ‘‘ (اول، دوم، سوم مفتوح) موجود ہے، اگرچہ معنی ذرا مختلف ہیں۔ ممکن ہے اردو والوں نے اسی کو دیکھ کر اپنا لفظ بنا لیا ہو۔

ماخذ: لغات روز مرہ    
مصنف: شمس الرحمن فاروقی