Meaning ofSee meaning francisii in English, Hindi & Urdu

فرانسیسی اول مفتوح، نون معلن، یائے معروف، بمعنی’’فرانس سے متعلق‘‘، مثلاًً ’’فرانسیسی زبان، فرانسیسی قوم، ‘‘وغیرہ۔ شروع میں یہ لفظ ’’فراسیس‘‘ تھا، یعنی اس میں یائے نسبتی نہیں تھی اور خود اسی کے معنی وہی تھے جو آج ’’فرانسیسی‘‘ کے ہیں۔ یہ لفظ فرانسیسی لفظ Francais سے بنا ہے۔ اصل زبان میں اس کا تلفظ ’’فراں سے‘‘ ہے۔ پرانے زمانے کے لوگوں نے یا تو اسے نون غنہ کے بغیر، اوریائے معروف سے سنا (جو کچھ بعید نہیں)، یا اسے فارسی رسم الخط میں لکھا دیکھا اور بے نون غنہ لیکن مع یائے معروف فرض کیا۔ مغل بادشاہوں، خاص کر شاہجہاں کی فوج میں فرنگیوں کی بھی ایک پلٹن ہوتی تھی۔ شاہ جہاں کے زمانے میں اس پلٹن کا کمیدان ایک فرانسیسی تھا جس کا نام (یا خطاب) فراسیس خان تھا۔ انشا نے’’فراسیس‘‘ بمعنی ’’فرانس کا باشندہ‘‘ مع یائے معروف لکھا ہے ؎ پگڑی تو نہیں ہے یہ فراسیس کی ٹوپییاں وقت سلام اترے ہے ابلیس کی ٹوپی اغلب ہے کہ بعد میں اصل لفظ کا نون غنہ ہمارے لفظ میں شامل ہوگیا۔ اور جب ملک کا نام (فرانس) ہمارے یہاں زبانوں پر رواں ہوا تو’’فرانس‘‘ مع نون معلن کو اصل لغت اور’’فرانسیسی‘‘ کو فرض کرلیا گیا کہ اس میں یائے نسبتی ہے۔ یہ بات نظرانداز کردی گئی کہ ’’فرانسیسی‘‘ میں یائے نسبتی ہے تو اصل لفظ ’’فرانس‘‘ نہیں بلکہ’’فرانسیس‘‘ ہوگا۔ لیکن نئے لفظ یوں ہی بنتے ہیں۔ لفظ ’’فرانسیس‘‘ بھی بہت دن مستعمل رہا، لیکن بہت کم۔ شیکسپیئر میں’’فرانسیس‘‘ یا ’’فرانسیسی‘‘ نہیں ہے، صرف ’’فراسیس‘‘ ہے۔ فیلن نے ’’فراسیس‘‘ درج کیا ہے۔ لیکن اس کا ایک تلفظ ’’فرانسیس‘‘ بھی بتایا ہے۔ گویا فیلن کے لغت کی تالیف کے وقت (۹۷۸۱) تک ’’فرانسیس‘‘ رائج ہونے لگا تھا۔ پلیٹس نے ’’فراسیس/فراسیسی‘‘ کو اصل لفظ کے طور پر داخل کیا ہے اور ’’فرانسیسی‘‘ کو ان کی محرف شکل کے طور پر۔ اقبال کی ’’مسجد قرطبہ‘‘ میں ’’فرانسیس‘‘ مع نون غنہ ہے، لیکن وہاں یہ واضح نہیں کہ بمعنی ’’فرانس‘‘ ہے، یا بمعنی ’’فرانسیسی‘‘؎ چشم فرانسیس بھی دیکھ چکی انقلاب جس سے دگرگوں ہوا مغربیوں کا جہاں ’’فرانسہ‘‘ اور ’’فرنسہ‘‘ بھی بمعنی ’’فرانس‘‘ مستعمل رہے، لیکن بہت شاذ۔ اول الذکر کا اندراج ’’اردو لغت، تاریخی اصول پر‘‘ میں ہے، لیکن ’’فرنسہ‘‘ اس میں بھی نہیں۔’فراسیس‘‘ تو پہلے ہی رخصت ہوچکا تھا، بالآخر’’فرانس‘‘ اور’’فرانسیسی‘‘ ہی رائج رہ گئے۔

ماخذ: لغات روز مرہ    
مصنف: شمس الرحمن فاروقی